REY E. MARTINEZ

Maraming taon na ang lumipas simula nang maranasan ng buong mundo ang hagupit ng pandemyang tinatawag na COVID 19 at patuloy paring humahamon sa ating lahat hanggang sa kasalukuyang panahon. Dulot rin ng pandemyang ito, maraming mga Pilipino sa ating bansa ang nahirapang bumangon dahil sa mga pagsubok na ibinigay ng pandemyang ito. Kasama sa mga nahirapang umusad ang iba’t ibang sektor sa ating lipunan, partikular na nga ang sektor ng edukasyon na kinabibilangan ng mga guro at daan-daang mag-aaral sa ating bansa.

Sa kabila ng nararanasang pandemya, napagdesisyunan ng ating gobyerno, kasama ng mga sektor ng edukasyon tulad ng Department of Education (Deped) at Commission on Higher Education (CHED) na ipatupad ang distance learning upang kahit nasa gitna tayo ng pandemya ay maipagpatuloy parin ng mga mag-aaral at kaguruan ang proseso ng pagkatuto ng bawat isa. Kaakibat nito ang mga paraan gaya ng online, blended, at modular upang kahit nasa kanilang mga tahanan lamang ay masigurong nakakapag-aral parin ang mga estudyante; at sinimulan nga ang pagbubukas ng klase sa ating bansa noong ika-5 ng Oktubre taong 2020. 

Online Meeting Via Zoom App.

Sa kasalukuyang panahon, dalawang taon na ang nakalilipas nang simulan ang distance learning na pamamaraan ng pagtuturo, lalo na nga ang online class para sa mga guro at mga mag-aaral. Ang Online Class ay isang plataporma ng pag-aaral kung saan naisasagawa ang pagkatuto sa tulong ng internet kahit pa nasaang panig ka man naroroon. Naging malaki man ang ambag ng online class sa regular na daloy ng edukasyon sa ating bansa, lalo na nga sa gitna ng pandemya, hindi parin maikakaila na mayroon itong mga negatibong epekto na naidudulot sa mga taong sakop nito.

Ilan nga sa mga negatibong epekto nito ang mga sumusunod:

Una, hindi lahat ay may kakayahang makasabay sa paraan ng online learning, dahil sa kakulangan ng sapat na salapi upang mabili ang teknolohiyang gagamitin sa pagkatuto, kasama na nga rito ang internet o load na kakailanganin din upang mas makasabay pa sa pag-aaral.
Pangalawa, ang mahinang signal ay hamon rin sa mga guro at mag-aaral para sa daloy ng kanilang mga gawain at aralin.
Pangatlo, limitado lamang ang mga gawaing maaari nilang isagawa upang mas lalo pang maunawaan ang mga aralin.
Pang-apat, mas mahirap para sa mga guro ang magturo dahil hindi nila kaharap ang kanilang mga estudyante.
Pang-lima, ang ilang mag-aaral ay hindi tutok sa kanilang pag-aaral dahil hati sa ibang bagay ang oras at atensyon.

Sa kabuuan, ang mga negatibong epekto ng online class ay tunay na nakakabahala para sa pisikal at mental na kalusugan ng mga guro at ng mga mag-aaral

Kabilaan man ang pagsubok na nararanasan ng mga guro at mag-aaral sa online learning, kailangan paring magpatuloy dahil isa lamang ito sa marami pang mga hamon na makakayanang harapin pagdating ng panahon. Darating din ang araw na muli tayong magsasama-sama sa sintang paaralan, kung saan mas madadama natin ang presensya ng bawat isa na mas mag-aangat pa sa edukasyon bilang ating inspirasyon upang lumaban pa. Kaya naman para sa lahat ng mga kaguruan at mag-aaral na matiyagang nagtataguyod ng ating edukasyon sa gitna ng pandemyang ito…Laban lang!